اکسفؤرد بيس ساله کي هر سال ىکته واجه-أ سال ٚ واجه وادؤنئنه (اعلام کؤنه). اي واجأن (کلمأن) تينن قديمي أن بۊبۊۊن ولي خأن اۊ سال ٚ حال ؤ هوا ؤ بگۊبشتؤؤن-ه بدأره.
۲۰۲۴ سال ٚ واجه بۊبؤ «Brain Rot» کي مغز ٚ پيسسن ؤ بپيسسه مغز معني دئنه. اي واجه ۱۹ قرن ٚ شئه ولي هندئه أمئه زمت کار دکته. ايسه ىعني چي؟ وختي ىک نفر بي أنديفه ؤ بي أرزش مطالب-ه زيادي مصرف کؤنه، مطالبي کي حتى نشأنه اۊشؤن-ه نقد گۊدن، اين ٚ ذهن ؤ وير بپيسسه حساب بنه ؤ اۊ جۊر مطالب أن ادم ٚ مغز-ه پيسؤنئنن.
اي سالؤن کي اينترنت ؤ «فجازي» مئن ادمؤن صۊب تا شؤ هزار جۊر دۊرۊس ؤ نادۊرۊس ؤ راس ؤ دۊرؤ مطلب ٚ مئن جير ؤ جؤر شؤدرن، اي کلمه ني دۊمرته دکته مردۊم ٚ دهن.
ايسه مۊ فکر کأدبوم گيلکي مئن اي مفهۊم ئبه چي دأنيم! مأ ىاد بمأ أمه «کۊل ٚ مغز» دأنيم. وختي ادم ٚ ذهن ؤ وير ٚ تيجي کۊلأبنه، ايسه ىا خرفتي أجي ىا نادؤني أجي ىا چرت ٚ چؤلا مئن جيراشؤن ٚ جي، گۊنيم فلؤن‌کسک ٚ مغز کۊلأبؤ، دئه تيج نئه، کۊل ٚمغزه! اينترنت ٚ مئن بي أنديفه ؤ بي أرزش مطالب-ه جير ؤ جؤر گۊدن أن هيتؤ ادم ٚ مغز-ه کۊل کؤنه؛ اي جۊر مطالب مغزکۊلأکۊن ايسن.
بسچي گه «بپيسسه مغز» أن تينه ائره مۊناسب ببۊن. اي جۊر مطالب کي مجازي پلتفؤرمؤن ٚ مئن دره ويشتري مغز-ه پيسؤنئنن. شاىد «مۊز بۊده مغز» أن بد نبۊن. ولي مي نظر کۊل ٚ مغز ؤ مغز کۊلاکۊن دقيقتره.
شيمه مغز ؤ ذهن-ه اي «فجازي» مئن بپپأىن کي تيج بۊمؤنه زأکؤن! 😉