شاید شمرأني شمئبه سؤال پيش بمأبۊن کي ايشؤن چيسن ؤ همديگرˇ همرأ چي فرقي کۊنن؟
پيچئه-شآل (/pice:šəāl/):
پيچئه-شآل فارسي مئن بنه: گربهٔ وحشی ؤ رۊسي مئن بنه Лесной кот ؤ اينˇ علمي نؤم Felis silvestris ايسه.
اشپتکا (/Ešpetekā/):
گۊنن اشپتکا رۊسي أجي بمأ. البته گيلکي مئن ىکته هأچي نظريه هننأ کي گۊنه هرته کلمه سراخر «کا» ىا «که» بدأره، رۊسئه! اي عوامانه نظريه باعث بنه کي خيال بکۊنيم مثلاً «واويشکه» رۊسئه ؤ دئه ىاداکۊنيم کي واويشکه، واويشتن/وابيشتنˇ مصدر أجي چاگۊده بۊبؤ ؤ گيلکي مئن پۊر-پۊرˇ «که» پسونده.
دوأريم؛ اشپتکا البته رۊسي أجي بمأ ولي نأ خۊ «که» پسوندˇ وأسي! رۊسي مئن أهلي راسۊ بنه Фретка کي فرئتکا واگۊىه بنه أمما أگه ىک نفر رۊسي بلد نۊبۊن ؤ رۊسي أليفبيه لاتيني همرأ اشتبا بگيره، اۊنه اشپتکا خؤنه!
اشپتکا هۊني ايسه کي گيلکؤن زربانۊکأى ىا گنجˇبانۊ دۊخؤنن.
زربانۊکأى (/zarbānukay/) ىا گنجˇبانۊ (/ganjəbānu/):
زربانۊکأى ىا زربۊنکأى (/zarbunəkay/) ىا گنجˇبانۊ، اينگيليسي مئن Least weasel ؤ رۊسي مئن Ласка بنه. اي جؤنور خطرناک ؤ خۊنخؤره ؤ گيلکي اؤسانه’نˇ مئن، ىکته نفرين بۊبؤ لاکؤ کي گنجˇ جاجيگه’ نۊشؤن دئنه. پس شاىد اي جؤنورˇ نؤمˇ مئن، گنج ؤ زر، هۊ گنج بۊبۊن ؤ بانۊ، اۊ لاکۊ.
ىپاره لهجه’نˇ مئن اي جؤنوره دۊخؤنن زربانۊلاکؤى (/zarbānulakoy/) کي شاىد اۊ دۊ ته’ جي کاملتر بۊبۊن چۊن ائره شأنه نتيجه گيتن کي اي کلمه زر (طلا ؤ گنج)+بۊن (جير)+لاکؤى چاگۊده بۊبؤ.
پسنيويشت:
شاىد مۊ ىکجا سأب بۊده بي ىا ىپاره لهجه’نˇ مئن جۊرˇ ديگه بۊبۊن ىا ىپاره کلمه’ن هننأبۊن کي مۊ بيخبر بۊبۊم؛ مأ واخؤ بکۊنين تا اي وؤته تکميل بکۊنيم.
گنجˇبانؤى، مازندرؤنˇ گيلکي مئن گرزه بانؤى (گرزه: موش) ؤ گنجˇسرخۊسه دۊخؤنده بنه.
پسنیویشت۲: اي فیلم ٚ مئن بینین گه زربانۊکأی چۊتؤ تینه دأه ته خۊش‌‌ٚ قدد ٚ هني-ئه بگیره این ٚ خۊن-ه فۊدۊشه!
دیدگاهتان را بنویسید