اي رۊزؤن ئره نيويشتن مئبه عجيب ٚ غريبه. اي همه سال اينترنت ٚ مئن نيويشتهدرم هرگي اي جۊر تجرۊبه ندأشتم. ايتؤ کي اي وبلاگ دۊنىا ادمؤن ئبه دسبرس نبي ؤ دئه «اينترنت» ٚ مئن دننئهبي ؤ خالي جؤمۊري اسلامي مللي لابدؤن ٚ سر دسبرس ببي!
سالؤن ٚ پيش تصميم بىتهبۊم مي اطلاعات ؤ بنويشتأن ؤ مي دۊ دأهه کار ٚ حاصل-ه (ىعني هي وبلاگ-ه) ايران ٚ سئروئرؤن ٚ سر بدأرم. مي ترجيح اين بۊ. معني ندأشت أمئه چأگۊده مؤحتوا خارجئن ٚ سئروئرؤن ٚ سر بۊمؤنه؛ ايتؤ خيال گۊدم!
ولي ألنى بفأمسم کي بئتر بۊ خارج ٚ سئروئر ٚ سر ايسأبۊم. اۊتؤ ناقلن همه تينسن ئره-أ بىنن. دۊنىا ادمؤن که اينترنت ٚ جي دئه ؤ أمئه مملکت ٚ ادمؤن أن نيابتي (پراکسي) جي. نۊدؤنم! شاىد هي کار-ه بۊدم. فعلا کي «ينترنت ٚ حق» ٚ جي محرۊميم.
اينترنت-ه قطعأگۊدن دقيقا اين-ه مؤنه کي مردۊم ٚ برق ؤ اؤ ؤ گاز ؤ تلفؤن-ه عمدا قطعأکۊنن. بسچي گه مي حواس هننأ کي همه چي بهانهأ ؤ عملا فقط اينترنت-ه گرؤنأگۊدن ؤ باخي چيزؤن ٚ مۊرسؤن هرکي پۊل بدأره اينترنت أن دأنه هرکي أن ندأنه، دئه ندأنه!
أمئه مۊرسؤن ادمؤن ئبه کي اينترنت ٚ مئن نيويسنيم ؤ کسب ؤ کار دأنيم فقط همه چي سختتر ؤ گرؤنتر بۊبؤ (چي أمئبه سختتر ؤ گرؤنتر نۊبؤ اي سالؤن؟) ؤ أمئه کينه ؤ نفرت أن سانسۊرچي ؤ سانسۊر ٚ جي پۊل در أردن کسؤن ٚ جي ويشته! بسچي گه مي حواس هننأ کي عملا دئه اي دۊ جرگه ىکته جرگه ايسن؛ خر نيم!)
اي گب-أن عاقل ٚ کس باور نۊکؤنه کي چۊن امريکا ؤ اسراييل ايتؤ غير ٚقانۊني فترکسن أمئه کشور-ه پس اينترنت خأ قطع بۊبۊن. هندئه هين-ه مؤنه کي چۊن جنگه پس مردۊم ٚ پؤستي أمانتؤن-ه دئه مقصد فنرسؤنيم ؤ اؤ ؤ گاز ؤ برق-ه عمدا بزنيم قطعأکۊنيم ؤ حمل ٚنقل-ه مؤختل بکۊنيم!
شاىد شمه-ره باور نأ؛ ولي هي ألؤن رۊسيه مئن کي چن ساله اؤکرايين ٚ همرأ جنگسهدره، اينترنت وصله تازه هرجا کي ايشؤن ٚ دۊشمند مۊشک زئنه ىا فترکنه، اؤره جي عکس ؤ فيلم گيتن مردۊم ئبه ازاده ؤ تينن بنئن اينترنت ٚ مئن.
ولي دئه چي شأنه گۊدن! فعلا من أني خئلئن ٚ مۊرسؤن همه جۊر حقسأى کؤنم کي أننى اينترنت-ه وصلأبۊم بىنم اي پيله دۊنىا ى ٚ مئن ادمؤن چي فکر کؤنن، چي خيال کؤنن، چي فند زئنن، چي فکأشتن، چي بکأشتن، کي قأر بۊده کي اشتي!
ايسه هرچي أن ئره نيويسنم مألۊم نئه کىني خأ بۊخؤنده بۊبۊن؛ ولي نيويشتن ٚ خؤبي مگه ىکته أن هين نئه کي أمأنين رۊزؤن-ه چيۊشم بدۊته دأنه؟ مئبه کتبي گب ؤ شفاهي گب ٚ تؤفير ايشؤن ٚ لحن ؤ رسميت ؤ غير ٚرسميت نئه؛ اين أن نئه کي أنگۊشت ؤ مداد ؤ کيبؤرد ٚ جي بنويشته بۊبؤبي ىا زبؤن ؤ گۊلي ؤ گاز ٚ جي! بلکي هي پيشاىين-ه (آینده) پيرأستن ىا هي ألؤن ؤ هيسه ؤ دم-ه پيرأستن، ايشؤن ٚ مئن ٚ تؤفيره. مکتۊب ؤ بنويشته گب، پيشاىين- چيۊشم بدۊته دأنه.
(تصوير ىکته طرحه أردشير محصص ٚ جي)
»» از وبلاگ ورگ و پروژههای گیلکی حمایت مالی کنید (فيلترشکن ٚ لازمه).
دیدگاهتان را بنویسید