مي رفيقى الىۊشا، ىکته داستان-ه کي طنز أجي ىکته ساده ماجرا-ا نقل کأدره ولي اي نقل ٚ مئن، شيمه حقيقت أجي باورؤن-ه أنتريک کؤنه. اي داستان ٚ بنويشتٚکس ارکادي ارکانؤف (Аркадий Михайлович Арканов) ايسسه ؤ مهاپا رۊسي زبؤن أجي وگردؤنه گيلکي. اي داستان پيشتر قاف ٚ مئن چاپ بۊبؤ ؤ بيس دئقه پادکست ٚ مئن أني ضبط بۊبؤ کي تينين ائره بشتؤيين.
ونأشتن یکشمبه رۊز-ه راحت بۊخۊسم. تلفؤن بزئه بۊ سیم ٚ آخر! منم تترج گۊشي-ه ویتم ؤ هیتؤ کي نۊدؤنسم کي همرأ گب زئدرم، همه چي همرأ مۊافقت گۊدم! خالي این وأسي کي مأ دس ویگیرن ؤ وأبدئن کي بۊخۊسم. اۊ رۊز تا تینسن هر کار ئبه مي رضایت-ه هأگیرن. اۊ رۊز تا صۊب ٚ سر، مي بیس ٚ سه رۊبل طلب-ه ببخشئم. یک نفر ٚ همرأ کي مأ یاد دننئه کي بۊ، یک جا که هندئه نۊدؤنم کؤره بۊ، قرار بنأم ؤ اي نفر ٚ ضمانت-ه بۊدم ؤ یکته سگ هأیتم سن‌برنار ٚ نژاد، مي اسلاوي شکاف أم بفۊرتم! سراخره تمؤم ٚ اي جریانات ٚ مئن، آمریکا ی ٚ رئيس جؤمۊر ٚ قتل أم گردن بیتم! البته اي آخري فۊخۊس ٚ مئن بۊ. اي ترس أجي گه نکتا مئبه شۊم ٚ داستؤن پیش بأ، مي بالش-ه ویتم بۊشؤم مي پسر ٚ اۊتاق ؤ کاناپه سر وۊلؤأبؤم. ائره دئه تلفؤن ننأ بۊ؛ ألبته هننأبۊ ولي اسباب‌بازي.
مي سۊ ساله زأک، هیتؤ که خۊ پشم ٚ جۊرافؤن-ه جؤرأکشي، وأپۊرسئه: خأ بۊخۊسي؟
ـ اۊهۊم.
ـ خۊب نۊخۊتي؟
ـ اۊهۊم.
ـ امما مۊ خۊب بۊخۊتم.
هیتؤ خۊدبخۊدي واپۊرسئم: خؤ، چي خؤ بدی؟
ـ أول یکته خؤنه خؤ-ه بدئم؛ بأزین یکته سقف.
ـ عجب خؤیي بۊ!
ایواشی بۊتم ؤ بخۊتم. یکته ویزویز ٚ صدا جي بیدارأبۊم که تترج بگۊش أمأ. مي چيشمؤن-ه گه وابۊدم، بدئم مي پسر هیتؤ تترج ویزویز کؤنه. هیتؤ که مي کلله کار نۊد واپۊرسئم: چره ویزویز کؤني پسر؟
ـ مۊ ویزویز نۊکؤنم. تلفؤن ٚ صداا!
بأزین اسباب‌بازي تلفؤن ٚ گۊشي-ئه ویته: بأله؟ کیسه؟ اليۊشا؟ چۊتؤ بۊخۊتي؟ مۊ خۊب بۊخۊتم. أول یته خؤنه خؤ-ه بدئم بأزین یته سقف-ه. بابا خؤنه ایسأ. خۊته. حتما دیشؤ شیطؤني بۊده…
غیض أجي بۊتم: أراجیف نگۊ رئه!
دۊمباله بدأ: بیدارأبؤ. ألؤن زنأکؤن-ه… بابا! الیۊشا تي همرأ کار دأنه. گۊشي-ئه هأدئنم تأ.
مي چیشمؤن-ه وانۊده واپۊرسئم: الیۊشا دئه کیسه؟
ـ مي رفئقی.
ـ این-ه بگۊ بعد زنگ بزني. مۊ خۊتم.
ـ اي خۊته الیۊشا. بعد زنگ بزن دئه…
مي دس رۊ بۊبؤ بۊ. هندئه ویزویز ٚ صدا بشتؤسم. بنیشتم گیجاگیجي مي پسر-ه نیگا بۊدم: هندئه ویزویز کؤني؟
ـ ألؤن «بعد»ه دئه. حتما الیۊشا زنگ زئدره.
این-ه بۊته ؤ گۊشي-ئه ویته: الیۊشا؟ ألؤن بیدارأبؤ. بابا، الیۊشا.
بفأمسم کي خلاصي ندأنم. أسباببازي تلفؤن ٚ گۊشي-ه ویتم ؤ دچکؤنئم مي گۊش-ه، تۊنداتۊند بۊتم: الیۊشا! تي کار چیسه؟ هیچ کاري ندأني؟ خؤ دئه جؤن، تي مۊراقب ببۊ الیۊشا…
ـ این-ه واپۊرس چي خؤ بدئه؟
ـ چي خؤ بدي الیۊشا؟ أول خؤنه خؤ بأزین پۊشت ٚبؤم؟ اففرین. خۊدافظ الیۊشا.
ـ چره ألٚکي گۊني کي أول خؤنه خؤ-ه بدئه بأزۊن پۊشت ٚبؤم؟ این که مي خؤ بۊ…
*
یکته کۊچ ٚ زأک ٚ دس تۊکؤن دأن أجي، مي چیشمؤن وابۊبؤن. أسباببازي تلفؤن ٚ گۊشي-ه بدأشته‌بۊ مي دیم ٚ پیش: الیۊشا شۊخي بۊده. یکته گل ٚمۊش ٚ خؤ-ه بدئه. مادده بۊ. [گل ٚمۊش: موش کور]
ـ چي؟!
ـ گل ٚمۊش! مادده گل ٚمۊش! دشت ؤ دامؤن ٚ مئن ؤ گل ٚمۊش ٚ مأرؤن ؤ خۊشؤن ٚ زأکؤن ٚ همرأ… أگه باور نۊکؤني خؤدت این أجي واپۊرس.
وادارأبؤم گۊشي-ه ویگیرم: الیۊشا؟ گل ٚمۊش ٚ خؤ-ه بدی؟ چي خؤب، چي خؤب، ألؤ… ألؤ…
گۊشي-ه بنأم.
ـ چي بۊبؤ؟
ـ الیۊشا مامان این-ه دۊخؤنده بۊته کي خۊ قلنهار-ه بۊخؤري دئه تلفؤن نزني.
بأزۊن یکته دهن‌وله بۊدم ؤ بکتم کاناپه سر. مي پسر مأ یته نرم ٚچیش نیگا بۊده بۊته: آالیۊشا مامان مننئه این-ه دۊخؤنه قلنهار ئبه. دیرۊ بۊشؤ لنینگرات.
ـ پس این ٚ ننه بۊ.
ـ آلیۊشا مأمان بۊشؤ لنینگرات، این ٚ ننه ورجه.
ـ خؤ پس یکته دئه زنأی بۊ.
ـ چي بد بۊبؤ!
تام بزئه، بأزین دۊمباله بدأ: پس تۊ خأ زنگ بزني لنینگرات، الیۊشا مامان-ه بۊگؤی کي یته غریبه زنأی ایشؤن ٚ خؤنه ایسأ.
أسباببازي تلفؤن ٚ گۊشي-ه ویتم زنگ بزئم لنینگرات ؤ الیۊشا مأر-ه بۊتم وختي کي بۊشؤ، یته دئه زنأی ایشؤن ٚ خؤنه بمأ دأنه. بأزۊن یکته دراز ٚ زمت گۊش بدأم کي الیۊشا مأر چي جواب دئنه. وختي گۊشي-ه بنأم مي پسر بيطاقتي همرأ بۊته: خؤ چي بۊبؤ؟
ـ خبر دأشت. اي زنأی الیۊشا ماشل بۊ. [ماشل: خاله]
مي ریکأی یکهؤ برزخأبؤ: تۊ همیشک دۊرؤ گۊني؟ همه‌ته باباؤن تي مۊرسؤنن. همه‌ته مأرؤن ٚ همره بدن. مۊ ألنی زنگ زئنم.
یکته نفس ٚ راحت بکشئم بۊتم «خؤب کاري کؤني» ؤ مي چیشمؤن-ه دبستم ؤ فیکرأشؤم کي شایدم اي کار مردأکؤن ٚ منافع ٚ وأسي خئلي أم دۊرۊس نبۊن!
مي پسر خئلي زۊد مأ خؤ أجي ویریسؤنه: زنگ بزئم. الیۊشا مامان هواپیما همرأ لنینگرات ٚ جي بمأ. الیۊشا بابا ترس أجي بۊشؤ شکاف ٚ مئن جا بۊخؤرده. ولي الیۊشا مامان این-ه پیدا بۊده ؤ الیۊشا بابا قؤل بدأ دئه اي جۊر کارؤن نکۊنه…
ایسه راسس-ه بۊگؤم، سالؤن ٚ ساله کي دۊدلم. گاگلف مئبه فیکرأشنم که اي تؤخمي تخیۊلي الیۊشا راسسه راسسه دره؟ مي کۊچ ٚ پسر هر چن وخت بٚسر یکته تازه خبر گۊنه الیۊشا ی ٚ زیندگي أجي ؤ أمه رأجي خأنه این ٚ همرأ همدردي بکۊنیم ؤ این ٚ پۊشت بئسيم ؤ مشورت هأدیم.
سراخره هي چندي پیش مي پسر کي دئه ألنی یته بیس ٚسۊ ساله جۊوؤنه، بۊته:
بابا، الیۊشا کي تأ یاد دره؟ مي قدیمي رفئقی.
ـ مأ یاد دره. چۊتؤ؟
ـ عرۊسي بۊده. پئنجا (۵۰) رۊبل مأ هأدي این ٚ رۊنما یئبه.
بأزین وگرسه خۊشه بزئه اۊ راه ؤ درجیک أجي بیرۊن-ه نیگا بۊده.
ایسه مۊ فقط این-ه ترسنم کي من ؤ مي زنأی وادار ببیم الیۊشا پسرم زأکمأري بکۊنیم.
دیدگاهتان را بنویسید